បើយោងតាមលទ្ធផលនៃជំនួបចរចា រវាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណា ចក្រកម្ពុជាជាមួយឯកអគ្គរាជទូតថ្មី របស់ ប្រទេសប្រុយណេ ប្រចាំនៅកម្ពុជា ភនេ អិរាម ឌាតៀ សីមាលិ កាលពីព្រឹកថ្ងៃទី ២៣ ខែមិថុនា ឆ្នាំ ២០០៩ នៅក្រសួងការ បរទេសបានឱ្យដឹងថា រដ្ឋាភិបាលប្រទេស ប្រុយណេនឹងយល់ព្រមទទួលយកការនាំ ចេញអង្ករពីប្រទេសកម្ពុជាចំនួន ១.៥០០ តោន ដែលការនាំចេញនេះគឺជាការនាំចេញ អង្ករលើកដំបូងទៅកាន់ប្រទេសប្រុយណេ ជាសមាជិកអាស៊ានដូចគ្នា ។
លោក ស៊្រី ថាមរ៉ុង ទីប្រឹក្សាផ្ទាល់របស់ សម្តេចនាយករដ្ឋមន្ត្រី ហ៊ុន សែន បានមាន ប្រសាសន៍ប្រាប់ក្រុមអ្នកយកព័ត៌មាន ក្រោយជំនួបចរចាថា “វាជាដំណឹងល្អមួយ សម្រាប់ប្រទេសកម្ពុជា តាមរយៈឯកអគ្គ រាជទូតថ្មីដោយលោកបានបញ្ជាក់ថា រដ្ឋាភិ បាលប្រុយណេនឹងធ្វើការសម្រេចនាំអង្ករ ពីប្រទេសកម្ពុជាចំនួន
១.៥០០ តោន ដែល នេះគឺជាការចាប់ផ្តើមនៃការនាំចេញអង្ករ ជាលើកដំបូងពីប្រទេសកម្ពុជា ទៅកាន់ ប្រទេសប្រុយណេ ”។
លោក ស៊្រី ថាមរ៉ុង បានឱ្យដឹងទៀតថា លោកឯកអគ្គរាជទូតថ្មី បានបរិភោគអង្ករ របស់កម្ពុជារួចហើយ ហើយលោកសរសើរ ថា រសជាតិអង្ករកម្ពុជាឆ្ងាញ់ ប៉ុន្តែ អ្វីដែល សំខាន់នោះគឺតម្រូវការ និងការទទួលយក ពីទីផ្សារទៅក្នុងប្រទេសប្រុយណេទាំង មូលតែម្តង ។
បើតាមការឱ្យដឹងរបស់លោក ស៊្រី ថាមរ៉ុង បានបន្ថែមទៀតថា ជាការឆ្លើយ តបសម្តេចនាយករដ្ឋមន្ត្រី ហ៊ុន សែន ចង់ បាននូវកិច្ចសហប្រតិបត្តិការឱ្យបានឆាប់ជា បីំផុត បើសិនជារដ្ឋាភិបាលប្រុយណេចង់ បានពូជអង្ករដែលជាការសមស្របសម្រាប់ ទីផ្សារនោះ យើងនឹងអាចដាំស្រូវធ្វើស្រែ ចម្ការឱ្យបានច្រើនដើម្បីបាននាំអង្ករទៅ កាន់ប្រទេសប្រុយណេ ពីព្រោះនេះគឺជា ទីផ្សារថ្មីរបស់ប្រទេសកម្ពុជា ។
លោក កង ច័ន្ទដារ៉ារ័ត្ន អ្នកវិភាគសេដ្ឋ កិច្ចមួយរូប និងជាប្រធានវិទ្យាស្ថានសិក្សា និងអភិវឌ្ឍន៍កម្ពុជា បានប្រាប់សារព័ត៌មាន ដើមអម្ពិលតាមទូរស័ព្ទកាលពីរសៀលថ្ងៃ អង្គារម្សិលមិញថា “ នេះគឺជារឿងដ៏ល្អ បំផុត ដែលរដ្ឋាភិបាលប្រុយណេយល់ព្រម ទទួលយកការនាំចេញអង្ករជាលើកដំបូងពី ប្រទេសកម្ពុជា ពីព្រោះយើងនឹងបានទីផ្សារ ថ្មីៗច្រើនទៀត សម្រាប់ការនាំចេញផលិត ផលកសិកម្ម ពីព្រោះវាគឺជាដំណាំដ៏ចម្បង បំផុតសម្រាប់ប្រទេសកម្ពុជាយើង ហើយ ជាមួយគ្នានោះ វានឹងធ្វើឱ្យតម្លៃអង្កររបស់ យើងមានតម្លៃកាន់តែល្អថែមទៀត នៅ ពេលមានទីផ្សារថ្មីៗទាំងនេះ ”។
លោក ភូ ពុយ ប្រធានសមាគមកិន ស្រូវកម្ពុជាបានប្រាប់សារព័ត៌មានដើមអម្ពិល ឱ្យដឹងផងដែរថា វាគឺជាចំណុចចាប់ផ្តើម មួយដ៏ល្អ និងមានសារៈសំខាន់បំផុត ដែល រដ្ឋាភិបាលប្រុយណេយល់ព្រមទទួលយក នូវការនាំចេញអង្ករពីប្រទេសកម្ពុជា ដែល វាគឺជាការចាប់ផ្តើមដ៏ល្អមែនទែន ហើយ បើសិនជាទីផ្សារនៅប្រទេសប្រុយណេគេ ទទួលស្គាល់នោះយើងនឹងទទួលបានជោគជ័យ នៅទីផ្សារដ៏ធំមួយទៀត នៃការនាំ ចេញអង្ករ ។
លោក ភូ ពុយ បានមានប្រសាសន៍ទៀត ថា “សម្រាប់ការនាំចេញអង្ករកន្លងមកទៅ កាន់ទីផ្សារបរទេសនោះ ភាគច្រើនតាម រោងចក្រម៉ាស៊ីនកិនស្រូវទាំងអស់នាំតែ រាយៗមិនទាន់ធំដុំនោះទេ ហើយកន្លង មកនេះការនាំចេញអង្ករទៅកាន់ទីផ្សារ បរទេស មានការរតាក់រតុំបន្តិចបន្តួច ដោយសារតែទីមួយ គុណភាព ទីពីរ បរិមាណ និងទីបី ពេលវេលា ប៉ុន្តែ យើង កំពុងតែរៀបចំ និងបង្កើនការយកចិត្តទុក ដាក់ទៅលើបញ្ហាទាំងអស់នេះហើយ ដូច្នេះនៅចុងឆ្នាំ ២០០៩ និង ដើមឆ្នាំ ២០១០ នេះ យើងនឹងមានដំណើរការបាន ច្រើនជាងនេះ ”។
យោងតាមកាសែតភ្នំពេញប៉ុស្តិ៍បានឱ្យ ដឹងកាលពីថ្ងៃច័ន្ទថា សមាគមរោងចក្រកិន ស្រូវកម្ពុជាមានផែនការនាំចូលម៉ាស៊ីនកិន ស្រូវមួយគ្រឿង ពីប្រទេសកូរ៉េខាងត្បូង ដែលអាចជួយជំរុញដល់ក្រុមកសិករកាន់ តែមានភាពប្រសើរឡើង សម្រាប់ការ កិនស្រូវដែលទទួលបាននូវទិន្នផលអង្ករ ប្រកបដោយគុណភាពខ្ពស់ និងមានតម្លៃ ថ្លៃសម្រាប់ការនាំចេញ ។
លោក ភូ ពុយ បានមានប្រសាសន៍ប្រាប់ កាសែតភ្នំពេញប៉ុស្តិ៍ថា ម៉ាស៊ីនកិនស្រូវ មួយគ្រឿងដែលយើងទិញពីប្រទេសកូរ៉េ ខាងត្បូងនៅខែក្រោយនោះ ដែលនឹងត្រូវ បញ្ជូនទៅខេត្តបាត់ដំបង គឺមានតម្លៃជាង ១០ម៉ឺនដុល្លារ ។ លោក ភូ ពុយ បានបន្ត ទៀតថា “យើងបានឃើញនូវទិន្នផលស្រូវ របស់យើង មានការកើនឡើងតាមឆ្នាំ នីមួយៗ ប៉ុន្តែ យើងនៅតែគ្មានម៉ាស៊ីនកិន ស្រូវសម្រាប់បែងចែកនូវប្រភេទអង្ករ ប្រកបដោយគុណភាព និងតាមស្តង់ដារ នោះទេ ដូច្នេះនៅពេលដែលយើងមាន ម៉ាស៊ីននេះ វានឹងមានភាពងាយស្រួលយ៉ាង ខ្លាំងក្នុងដំណើរការ នៃការនាំចេញអង្ករទៅ កាន់ទីផ្សារអន្តរជាតិ ។
តាមការចុះផ្សាយរបស់កាសែតភ្នំពេញ ប៉ុស្តិ៍បានឱ្យដឹងទៀតថា តម្លៃអង្ករថ្នាក់ លេខ ១ គឺមានតម្លៃ ៦០ សេន ក្នុងមួយ គីឡូក្រាម និងអង្ករថ្នាក់លេខ ២ មានតម្លៃ ត្រឹម ៥០ សេន ក្នុងមួយគីឡូក្រាម ។
គួរបញ្ជាក់ថា កាលពីឆ្នាំ ២០០៨ កម្ពុជា ផលិតស្រូវបានជាង ៧ លានតោន ដែល ស្មើនឹងប្រមាណ ២.៤ លានហិកតា នៃផ្ទៃ ដីដាំដុះ ។
ក្រៅពីកិច្ចពិភាក្សា រវាងសម្តេចនាយក រដ្ឋមន្ត្រី និងតំណាងឯកអគ្គរាជទូតថ្មីរបស់ ប្រទេសប្រុយណេប្រចាំកម្ពុជា ពីបញ្ហានេះ លោក ស៊្រី ថាមរ៉ុង បានឱ្យដឹងទៀតថា ឯក អគ្គរាជទូតថ្មីខាងលើនេះ បានប្តេជ្ញាដោយ ប្រើប្រាស់អស់ពីលទ្ធភាព ដើម្បីពង្រីកនិង ពង្រឹងទំនាក់ទំនងរវាងប្រទេសកម្ពុជា និង ប្រទេសប្រុយណេ ។
រួមជាមួយគ្នានោះ សម្តេនាយករដ្ឋមន្ត្រី ក៏បានស្នើសុំឱ្យរដ្ឋាភិបាលប្រុយណេ ដែល ជាប្រទេសមានបទពិសោធន៍នៅក្នុងវិស័យប្រេង និងឧស្ម័នធម្មជាតិឱ្យទទួលយក មន្ត្រីរបស់កម្ពុជាទៅសិក្សា ដើម្បីផ្លាស់ប្តូរ បទពិសោធន៍ និងផ្ទេរបច្ចេកវិទ្យាដើម្បីធ្វើ អាជីវកម្មដើម្បីវិស័យប្រេង និងឧស្ម័ន ធម្មជាតិក្នុងការទាញយកផលប្រយោជន៍ឱ្យបានច្រើន។
Written by DAP-NEWS
Wednesday, 24 June 2009 10:11